Vikedal bygdahus utset feiring av 25 årsjubileum til 2026

Bygdahuset feirar 25 år i 2024, og styret legg opp til feiring av dette våren 2026 då idrettshallen er 15 år. Dette blei bestemt på styremøte 23.09.24. 

Styret jobbar for tida med å oppgradere idrettshallen med flott fasade, maling av Bygdahuset og opprusting av inneområdet. Då passar det at styret prioriterar desse oppgåvene og jobbar for at ein skal kunne ha storslått feiring i 2026 med nytt og oppussa storstove. Det vil bli dugnad i samband med alt dette, så styret håpar bygdefolket er klare for å bli med på å få opp standarden på storstova vår igjen.

Nils Erik Eide 24.09.24

Vellukka sommarfestival 2024

Etter fem års pause vart endeleg Sommarfestivalen i Vikedal arrangert igjen. Det heile gjekk av stabelen laurdag 6. juli, og gjett om det blei ein suksess. Arrangementet var eit samarbeid mellom Vikedal båtforeining og Vikedal bygdahus. Sommarfestivalen var todelt, eit dagarrangement og eit kveldsarrangement. Det heile "knytt saman" med to timars aftersea med DeKinaputters. 

Det var heile 118 personar som deltok på fiskekonkurransen og mange andre møtte opp i båthamna der det var ulike aktivitetar og sal. Den berømte fiskesuppa blei servert og det var mykje god underhaldning for barn og vaksne. Kaptein Hjørnetann kom på besøk og han fekk med seg barna på å finne ein skatt. Som vanleg fann han ein person som hadde gjort noko bra for bygda det siste året. Jarl Magnus Lien, som har vore ein av drivkreftene til å få på plass den flotte pumptrackbanen måtte gå planken. Han har sjølvsagt ikkje gjort alt arbeidet sjølv, det har Kjerstina Særsten, Rikard Særsten og Johannes H. Leifsen m.fl også vore med på. Jarl Magnus "tok ein for laget" og måtte altså bade i det kalde vatnet. 

I tillegg til dette så var det gode musikalske innslag frå Etne kulturskule og DUOeg, som består av Beate Tandrevold og Nils Erik Eide. 

Kveldsarrangementet på Bygdahuset trakk heile 320 stk, Muddy Young starta kvelden med god stemning før Etne bandet Makalaust avslutta kvelden med fengende heimelaga countrysongar. 

Styreleiar Ina Helmers er godt nøgd med arrangementet. - Alt i alt ein vellukka dag med Sommarfestivalen i Vikedal, no får me håpa dette blir ein tradisjon igjen. Overskotet frå festivalen går til å fikse fasaden på idrettshallen og å oppgradere Bygdahuset generelt. Bygdahuset feirer heile 25 år i 2024, det vil bli markering av dette seinare i haust.

Sjå fleire bilder frå festivalen her

Nils Erik Eide 07.07.24